Bisaya, Enero 14, 2009
Nag-andam og masangkarong programa ang National Commission on Culture and the Arts (NCCA) para sa ika-18 nga pagsaulog sa "Buwan ng Sining" karong Pebrero 2009.
Gitawag og Philippine International Arts Festival (PAIF), ang pagsaulog binulokan sa lainlaing programa nga ipahigayon sa nagkadaiyang dapit sa nasod ug pagasalmotan sa lokal ug nasyonal nga mga alagad sa arte.
Ubos sa temang "Ani ng Sining", tuyo sa kasaulogan ang pagsipong sa mga abot sa arte dili lamang sa Metro Manila kondili labi na sa nagagikan sa ubang lalawigan sa kapupud-an aron mapalapdan ang kahiamgo sa mga lungsoranon niining maong natad.
Ang mga mosunod ing pipila lang sa gihan-ayng mga programa sa NCCA ubos sa pagdumala ni Chairman DepEd Usec Vilma Labrador ug Executive Director Cecile Guidote Alvarez.
Pormal nga Pagbukas. Ang PAIF pormal nga pagabuksan sa tulo ka venue: sa usa ka ma-Domingong variety show sa TV sa udto, sa Sining Gising sa NBN 4, ug sa "Concert at the Park" nga matan-aw usab sa NBN 4 (delayed telecast). Dungan usang pagabuksan ang PAIF sa piniling mga lugar sa Luzon, Visayas, ug Mindanao.
PA(ng)LABAS. Usa ka travel exposition, lecture forum, ug film showing nga ipahigayon sa Cine Adarna, Aldaba Theater, UP (Peb. 9-13, 2009); sa Cultural Center of the Philippines (Peb. 16-20, 2009); ug sa University of San Carlos, Cebu (Peb. 13-27, 2009).
Walai – Bernakular nga Arkitektura sa Mindanao. Usa ka eksibit sa mga hulagway sa lumadnong pinuy-anan. Kadungan sa eksibit mao ang lektyur sa pagpasundayag bahin sa mga ritwal pinaagi sa sayaw ug mga pamuhat-buhat nga may kalambigitan sa arkitektura. Pagahimoon kini gikan sa Pebrero 1 hangtod sa 6 tuig 2009.
Sinerehiyon. Pagasalmotan sa mga pelikulang gikan sa lainlaing rehiyon sa nasod. Pagahimoon kini sa Cultural Center of the Philippines sa Pebrero 17-19, 2009.
Tanghal! Ang Ikatulong National University Theater Festival. Pagasalmotan sa mga mananayaw sa lainlaing kolehiyo ug unibersidad sa Luzon, Kabisay-an, ug Mindanao ug NCR ubos sa pag-abag sa Lusong Luzon Arts and Culture Network. Pagahimoon kini sa Colegio de San Juan de Letran-Calamba sa Pebrero 10 hangtod 14, 2009.
Taboan Philippine Writers Festival. Usa ka panaghugoy-hugoy sa mga magsusulat sa mga rehiyon sa nasod aron panagsultihan ang mga isyu may kalabotan sa ilang arte. Pagahimoon kini sa UP-Diliman, Ateneo de Manila, ug Cubao Expo sa Pebrero 11-13. Sa Kabisay-an, dili paulahi ang Bisdak nga mga magsusulat kay ubay-ubay sab nila ang delegado niini sama nilang Josua Cabrera, Merlie Alunan, Bambi Beltran, Resil Mojares, Januar Yap, Richel Dorotan, Ian Casocot ug uban pa. Alang sa Mindanao, delegado sab sila si Christine Godinez-Ortega, Macario Tiu ug uban pa. Sa kinatibuk-an, 15 ang delegado sa Luzon, 18 sa Kabisay-an, 12 sa Mindanao, ug 40 sa NCR. Upat usab ka National Artist ang dinapit niining maong kalihokan wa pay labot sa langyawng mga magsusulat.
Organik Muzik. Mga pasundayag nga magpakita sa ebolusyon sa musikang Pilipinhon. Pagahimoon kini sa SM Baguio sa Pebrero 7, 2009; SM Cebu, Pebrero 14, 2009; SM Davao, Pebrero 21, 2009; SM Mall of Asia, Pebrero 28, 2009.
Kabahin usab sa kasaulogan sa "Buwan ng Sining" ang pagpirma sa Memorandum of Agreement tali sa NCCA ug sa kagamhanang probinsiyal sa Rizal alang sa Artist’s Housing Village sa Angono, ang subling pagbukas sa Metropolitan Theater, ug ang pagsubo sa Urdaneta Park sa Urdaneta City, Pangasinan isip pagsaulog sa ika-500 tuig ni Fray Andres de Urdaneta.
Sa dugang detalye, tawgi ang NCCA Public Affairs and Information Office sa Tel. No. 527-5529 / 527-2192 loc 612-615, o duaw sa www.ncca.gov.ph.
No comments:
Post a Comment