Kawit Sa Buntagon

Pinunpon ug hinikay ni E.S. Godin
Mga kaubang editor: Mar Mañus, Jr. ug Richel Dorotan


Mga napulo na tingali ka tuig ang minglabay dihang nakahunahuna ko pagpunpon sa mga balak nga nangapatik sa Magasing Bisaya.


Maayong pakli-paklion ang mga obra nga napunpon sa usa ka libro, matod ko sa hunahuna. Ug busa, gihiling ko ang natigom nga mga balak sa tagohipos sukad ko nahimong sakop sa staff sa maong magasin. Daghan kaayo. Ug bastante na nga tibuk-ong usa ka libro.

Pero dili lalim ang pagpapatik og libro ning panahona. Dili basta-basta labi nag walay moesponsor. Maayo mag publikador gyod kong may puhunan, wa man tawon tay dyamo.

Ang unang misantop sa akong hunahuna mao ang pag-amotay. Kinta, ang matag magbabalak nga maapil sa libro moabag. Magtinabangay lugar.

Pilay asoy, gipanangtang nako ang mga balak nga ang mga tagsulat patay na. Lisod baya pagpaningil og amot sa mga wala na, di ba? Mao tong ubay-ubay sad ang naiban. Nindota ra ba untang mga balaka. Pero unsaon ta man, gipangayo sa kahigayonan.

Sunod, akong gipangsulatan ang mga awtor agig pananghid ug kon andam ba silang mobulig. Daghan ang nahinangop pero diha poy pipila nga mingsuki. Yatis ra, ipatik ang ilang obra unya sila pay pabayron, nila pa. Nako pa sab, aw, di man sad ko mamugos. Ang nakasabot sa akong tuyo, maapil. Total, ang akong tumong, mao ra man gyod nga naa tay mahipos nga pinunpon nang basahon sa mga balak, dili man negosyo.

Sa panabang sa tagpatik (printer) nga akong nakontak, giestimeyt namo kon pilay gastoon ug pilay pagkahamutang sa kada usa ka kopya. Dayon ako na sang gipangsulatan (di pa uso ang selpon ug email niadto) ang mga interesadong mangapil sa aktuwal nga presyo ug kon tagpila ka kopya ang gusto nilang maangkon. Suma total, mingkabat gyog duha ka tuig kapin ang pangandam ayha migula ang libro sa patikanan.

Sa sugyot sa uban, nahimong duha ka matang ang basahon, dunay hardbound ug duna say softbound.

Dihang migawas ang libro, may nagpangutana kon asa puydeng makapalit. Pasayloa, kay ang giimprenta namo segun ra sa gidaghanon sa giorder sa mga nahiapil plas sa gahin alang sa national library.

Salamat sa tanang mingbulig.--