11/03/2008

NCCA Writers’ Prize

Ni Manoy Egay


NIADTONG Hulyo 25 ning tuiga, ang National Commission for Culture and the Arts (NCCA) mipasidungog sa lima ka mananaog sa 2007 NCCA Writer’s Prize sa mga kategoriyang Essay Category (English), – nga nakuha ni Ed Maranan sa iyang obrahonong "The Country in the Heart: A Writer’s Times and Travels"; Literary Biography Category (English/Filipino) – nga nasapupo usab ni Elyrah Loyola Salanga sa iyang sulatonong "Alfredo Navarro Salanga: Sa Mga Pahina at Ibang Salaysay"; Novel Category (Lengguwaheng Cebuano) – napunggit ni Telesforo Sungkit, Jr. sa ulohang "Mga Gapnod sa Kamad-an"; Poetry Category (Lengguwaheng Bicol) – nadughit ni Kristian S. Cordero sa iyang "Segunda Mano"; Short Stories Category (English/Filipino) – nga pagasulaton ni Rosario Cruz-Lucero sa ulohang "Papa’s Field and Other Stories of the Disappeared".

Duna sab untay Drama Category (sa bisan unsa nga lengguwahe sa Panay) apan walay midaog ning maong kategoriya.

Ang mga mingdaog nanagpakadawat og grant nga mokabat og P250,000 matag usa ingon man tropeyo, ug sertipiko.

Sa Gabii sa Pagpasidungog nga gipahigayon didto sa NCCA Lobby, NCCA Bldg., 635 Gen. Luna Street, Intramuros, Manila, kaming taga Bismag wa magpaulahi pagtambong aron personal nga mahimamat ug kapahalipayan ang mananaog sa kategoriyang nobelang Binisaya.

Ug tuod man, wa mi mauwat sa among dakong tuyo— gikahinabi gyod namo si Jun Sungkit tipon sa daghang inilang mga magsusuwat sa nasod. Maoy kauban ni Jun ang hait sab og dagang nga misteso Bol-anong si Dexter Cayanes kansang balak "Panggaris" mananaog sa Gawad Komisyon nga gihimoan sab niyag mubong pelikula diin na-finalist sab kini sa Cinemalaya ning tuiga, mitug-an nga si Jun o Telesforo Sungkit, Jr. nanulat sa Iningles, Filipino, Binisaya, ug Binukid nga wa gyod mogamit sa tinuod niyang ngalan— pulos dagangalan ang iyang gi-byline.

Lumad nga Higaonon si Jun— taga Malitbog, Bukidnon— ug adia karon sa Kaulohan isip eskolar sa Unibersidad sa Pilipinas, sa Los Baños sa kursong BS Agricultural Engineering. Apan usahay ang personal nga panaghinabi dili pa makatagbaw. Busa, sa tinguha nga labi pang matugkad ang kinauyokan sa pagka tawo ning garbong lumad nga Higaonon ug ang iyang mga gumaran sa kinabuhi, amo siyang gisegundahag interview pinaagig elektronikong sulat. Ang kompletong interbiyo mabasa sa Bisaya magasin gula Nobiyembre 19, 2008.