11/08/2008

Duha ka Librong Garbo Bisaya

Teksto nila ni ESG ug RGD
Potogaleri, Bisaya Nobiyembre 19, 2008


Dili Tanang Matagak Mahagbong

NAG-ALISNGAW pa gikan sa hudnohan, kining maong libro maoy pungpong sa mga balak ni Adonis Durado nga gi-launch niadtong Oktubre 18, 2008 dungan sa pagbukas sa "art exhibit" sa mga obra nila ni Prof. Radel Paredes ug Josua Cabrera didto sa Gallery Q sa Norkis Group Management Systems Inc. sa A.S. Fortuna, Mandaue City.

Ang maong libro may 188 ka pahina nga giundan sa 60 ka balak, apan matod sa tagsulat, 61 gyod tanan apan iya na sa magbabasa ang pagpangita sa usa. Ang mga balak— nga dasok sa binag-ong ekspresyon madula-dulaong naghulagway sa sensibilidad nga Bisaya— gihubad sa Iningles ni Dr. Merlie Alunan ug ang introduksiyon gikan sa panulat ni Magbabalak Vicente "Butch" Bandillo.

Kapulongan: Conversations With Cebuano Writers

LAING libro nga angay mabatonan mao ang "Kapulongan: Conversations With Cebuano Writers". Niining maong libro, mabasa nato ang tinagoang pamato sa mga magsusulat luyo sa ilang mga obra. Ang teksto niini mao mismo ang transkripto sa panaghinabi sa mga tigpanukiduki ngadto sa inilang mga magsusulat nga Bisaya sama nila ni Gremer Chan Reyes, Godofredo Roperos, Simeon Dumdom Jr., Ernesto Lariosa, Lamberto Ceballos, Josua Cabrera, Michael Obenieta, Ester Tapia, Januar Yap, Dr. Erlinda Alburo, ug Bambi Beltran, sa paghingalan lang og pipila. Mabasa usab ang sampol nga obra sa matag magsusulat nga nahilakip. Ang libro gieditan ni Dr. Hope Sapandan-Yu.

Gipatik kini sa University of San Carlos-Cebuano Studies Center ubos sa pagpaluyo sa Sunflower Press (Canada). Ang libro may pasukip nga DVD (kining makita sa hulagway) sa pakighinabi sa mga magsusulat.

Tungod sa maayong pedbak, mogawas na sab sa dili madugay ang ikaduhang bolyum sa laing hugna sa mga magsusulat.—

No comments: