12/20/2008

Libro ni S. Apoyon

Teksto ni EGAY TALIPSAI





Laing bag-ong librong piksiyon sa Binisaya, "Ang Gakit ni Noebong Ug Ubang Mga Sugilanon" ni Ginong Satur P. Apoyon nahaon da gayod sa patikanan ug gilusad niadtong hapon sa Disyembre 6, 2008 sa Museo Davao, Dakbayan sa Davao.


Ang maong proyekto gitambayayongan sa Davao Writers Guild, Inc. ug National Commission on Culture and Arts (NCCA).


Sa iyang mensahe, ang awtor nagkanayon: "Gihatag ko ang dakong kredito sa kalamposan sa gidamgo kong antolohiya kang UP-Mindanao Prof. Ricardo de Ungria, kinsa maoy pundador-presidente sa DWG, chair sa Literary Arts Committee ug Komisyoner sa NCCA Subcomission on the Arts. "


Sa seremonya, gipadalhan sa NCCA og usa ka representante nga si Mylene Urizza, koordinetor sa mga proyekto sa Visual Arts ug Literary Arts.


Ang "Ang Gakit Ni Noebong" giundan sa laing 12 ka sugilanon nga nangapatik na pod sa Bisaya Magasin. Adunay 96 ka pahina ang 5 x 8.5-pulgada nga basahon.


Sa akong paghimbis, ang sugilanong nahiapil ning maong libro nga nakadala og labing bug-at nga tangil sa merito mao ang "Dili Alang Kang David Ang Baboy-Ihalas", sugilanong miani sa Unang Ganti sa BATHALAD-Mindanao. Gani, para nako, kining obraha maoy usa sa morepresentar sa pagpanulat og piksiyon sa Binisaya ni Ginong Apoyon.



Nipis ra tuod ang 96-ka-pahinang basahon, apan kining libroha igo na kaayong makatagbaw sa mga buot mosusi sa unang mga agi sa dagang sa Bol-anong beterano sa pamantalaan ug potograpiyang de pelikula. Anugon lang nga wala mahilakip niini ang ulahi niyang mga obra sama sa "Artista Na Si Minggoy" ubp., mga obrang mipaliwag og lahing dyenra sa panugilanon tandi sa una niyang mga sinulat.--

3 comments:

Tito said...

asa kaha nato mapalit kining libro ni Noebong?

Pinoy Contests said...

Hello! If you love writing poems, you might want to join a poetry contest--and get a chance to win $500 in cash! Here are the details: http://pinoycontests.blogspot.com/2008/12/win-500-in-cash.html

egaytalipsai said...

Tubag ni SPA via email:
Bahin sa pangutana ni Tito sa Kamalig ni Egay niadtong Dis. 23, 2008 kon asa mapalit ang kopya sa "Ang Gakit ni Noebong Ug Ubang Mga Sugilanon", sa pagkakaron, sa limitadong mga hulad, sa tagsulat pa (7l Opal st., SM Village, 8000 Bangkal, Davao City) ug tingali unya sa NCCA, Intramuros, Manila.

Ang usa ka hulad tag-P200. Kon ipanugon sa koreyo, adunay patong nga Pl00 alang sa handling, packing ug mailing sulod sa Pilipinas. Apan ang sa langyawng kanasoran mokabat nag 500 kapin ka pesos ang bili sa usa lamang ka kopya gumikan sa kamahal sa freight o postage. Daghang salamat nga daan nga makatabang kamo sa pagpahayag niining impormasyona kon adunay magkainteres sa maong basahon. --SPA