Hulagway ni ESG
MAY bag-ong katarongan nganong magmaya ang Katitikang Bisaya. Ug nganong dili? Kay bag-ohay pa lang ganing napatik ang "Kapulongan: Conversations With Cebuano Writers", nahimugso na sab ang apasumpay sa maong libro. Kini mao ang "Kulokabildo: Dialogues With Cebuano Writers" (Kulukabildo unta ang tukmang espeling, apan kay ngalan man sa libro, tingali may iyang katarongan ang taghikay).
Ang naulahi maisip nga ikaduhang bolyum sa nahauna bisan tuod managlahi ang ilang mga ulohan sanglit nagsunod man kini sa usa lang ka konsepto nga mao ang transkripto sa pakighinabi ngadto sa mga magsusulat nga Bisdak.
Ang paglusad sa "Kulokabildo…" sa USC Buttenbruch Hall niadtong dakong palis sa 3 de Abril ning tuiga maisip nga reyunyon sa dagkong ngalan sa kapanulatang Bisaya. Kahinganlan sa nanambong mao sila si Dr. Linda Alburo, Dr. Merlie Alunan, Mel Baclay, Tonton Kintanar, Januar Yap, Kevin Lagunda, ug daghan pa.
Si Dr. Hope S. Yu, kinsa maoy editor ning mahinungdanong proyekto angayng pagakpakan sa iyang kaisog pag-ugkat sa mahinungdanong taras sa usa ka magsusulat inabagan sa iyang mga tinun-an sa Unibersidad sa San Carlos aron ikadokumento ang bayhon sa magsusulat nga nagbugtaw sa dilang Bisaya. Sa "Kulokabildo…" mabasa nato ang interbiyo ngadto nilang Tem Adlawan, Tito Alquizola, Merlie Alunan, Isolde Amante, Ulysses Aparece, Satur Apoyon, Mel Baclay, Butch Bandillo, Cecilia Manguerra-Brainard, Junne Canizares, Vince Cinches, Omar Khalid, Adonis Durado, Greg Fernandez, Jeneen Garcia, Marvi Gil, Edgar S. Godin, Tonton Kintanar, Arlaine Obenieta, Renato ug Roger Pono, Ma. Paloma Sandiego, Dindin Villarino, ug Melchor Yburan.
Sama sa maguwang nga libro, mabasa gihapon sa bulawanong panid sa "Kulokabildo…" ang tingog sa mga magsusulat sa lainlain sab nilang mga panahom unsa ang musa, arte, pagpanulat, ug uban pang isyung naglibot sa ilang disiplina. May mabasa usab nga definitive sample sa obra sa matag magsusulat nga giinterbiyo uban ang hubad niini ngadto sa Iningles alang sa pagsabot sa magbabasa sa kalibotan.
Wa tingaliy magbabasa nga dili maintriga sa kinabuhi sa usa ka magsusulat. Unsa kaha sila sa ilang mga takna? Giunsa kaha nila pag-ugmad ang ilang sinulat? Nganong paborito sa usa ka magsusulat ang usa ka tema? Unsa kahay iyang agpas sa kinabuhi isip alagad sa dagang?
Kining tanan matubag sa libro ug sa bidyo nga gipataban niini. Sa laing pagkasulti, ang pagbaton niining maong libro maoy pagsinati kun paglili, bisan gamay lang, sa makalingawng kalibotan sa mga magsusulat.--
No comments:
Post a Comment