Teksto ni Omar KhalidMga hulagway kortesiya sa bathaladsugbu.multiply.com
DI lang ang iyang mga balak ug sugilanon ang nagbaton og binag-ong aydyom apan ang iyang mga kuris-kuris usab nagtipig og susamang kapresko.
Wala masayop ang Bathalad-Cebu sa pagnombrar kang Josua Cabrera nga pamuno sa kapunongan. Ang tidlom sa iyang arte igo na kaayong hinungdan nganong ang Bathalad-Cebu maingon nga anaa sa maayong mga kamot.
Kining kinuwadrong mga hulagway nga atong makita mao ang ‘gasa’ sa Bathalad ngadto sa mga mamumulong sa bag-o lang natapos nga ika-13 nga kombensiyon sa kapunongan. Dinhi, maila nato nga wala gaposa ni Josua ang iyang kaugalingong limitasyon pag-interpretar sa tawo nga buot pasidunggan sa iyang arte. Matistis ang iyang atake. Ug makita ang iyang oryentasyon
isip kartonista. Apan bisan niini, gihatagan niyag hustisya ang kinabuhi luyo sa matag dibuho.Matikdi ang duha ka esena sa luyo nila ni Mel Allego ug Urias Almagro: Amerika ug Sugbo, di ba? Ug anaa ang gamit sa panambal sa pikas kamot ug ang dagang sa pikas kamot— usa ka tukma ug hiniusang paglangkob sa kinabuhi ning duha ka kundatan sa katitikang Bisdak.
Si Josua may kinaugalingong pagsabot sa pagka tawo ni Edfer. Matikdi ang detalyadong mga mata pinaresan sa matanghagaong pahiyom. Si Edfer man god, usa ka tawo nga di makahinan-aw sa Bathalad. Dili siya magpabaya ug andam mohatag og mga pagdasig unsay ikaayo sa kapunongan.
Si Editor Edgar Godin sab nagkinagang sa mga hulad sa Bisaya. Samtang sa talad, makita ang nagtagsok nga gimbuhaton sa buhatan ug gani, anaa ang tistis nga ang buluhaton kanunayng nagsunod-sunod kaniya.
Si Kanhi Komisyoner Dr. Ricky Nolasco usab nagdagan nga morag nakiglumba sa panahon nga nagbandera sa iyang kawsa sa edukasyong multilingguwal.
Si Dr. Resil Mojares usab sa iyang paghanduraw sa gituking basahon. Gipalibotan siya sa liboan ka mga libro nga nagpaabot sa iyang pag-at-at.
NIADTONG Pebrero 6, 2009, gibuksan ni Josua C. ang iyang solo exhibit sa Bluewater Gallery sa Sugbo uban sa pinasidunggang mga dinapit nga sila si Rep. Pablo John Garcia ug Architect Benjie Reyes. Ang eksibit may ulohan nga "Bahalinya". Nganong "Bahalinya" man? ako siyang gipangutana dihang nagkadungan mig paniudto sa dakbalay sa Sunstar Daily uban ni Insoy Niñal ug Kevin Lagunda.
Tungod kay ang bulok man mismo sa bahal ang gigamit niya isip medium niining maong serye sa mga pinintal. Gawas nga tuba ang iyang gigamit, ang mga tema sa iyang pinintal nagsentro sa metapora sa tuba ug sa tradisyon sa pag-inom niini.
Kulba ning maong eksibit. Ang mga ulohan sa iyang pinintal nagtangag sa tinagod-tagod nga mga balak-suryal sa kinse ka linyang Binisaya. Pinaagi niini, nakakuha siyag koneksiyon sa parada sa iyang kinse ka pinintal nga morag di mabuwag apan may tagsa-tagsang paglungtad.
Ang "Bahalinya" bukas sa publiko hangtod sa Pebrero 28, 2009 gikan sa alas 10:00 s.b hangtod sa alas 5:00 s.h. —
1 comment:
Ang bukid nga akong gidaro niadtong bata pa ko , bisag udtong dako tungod kay wala may relo adlaw sa langit akung tan-awon kung udto naba, pero sipyat man kay ang adlaw tungod sa subrang init mura naman udtong totuk...
mao gadaro ko 12pm udto dako ,,nani udto diay ko ug alas 11 sa buntag dili nako makalimtan ang gamay kung insperasyon...ang kinabuhi sa usa ka pobreng tao sa lagaylay carmen agusan del norte. ni anhi sa manila nanimpalad ug maayong pangnabuhi tungud kay ang uma umal na kaayo...ang akong komentaryo nga puhon diay matabangan ko ug usa tawong dato ug mutabang sa mga pobre mohatag ug gamay na negosyo karon palang dako kaayo ko pasalamat....
Post a Comment