.jpg)
USA ka dakong panghitabong katitikanon kining pagkapunpon sa sinulat nga mga sugilanon ni Gremer Chan Reyes nga mogawas na sa dili madugay. Sa kataposan, napunpon ug nahubad na gyod ngadto sa Iningles ang pipila sa pinalabing obra ni Reyes alang sa panginahanglang akademiko ug sa pagbasa sa mga dili Bisaya.
Si GCR nailang kontemporaryong maestro sa pagtagik og matahom nga mga sugilanon sa dagat sukad pa sa dekada saysenta. Ang mga sugilanong "Matag Tawo May Iyang Bulawanong Takna", "Ang Isda Sa Bulak sa Timpalan", "Ang Tawo Nga Nanamin sa Adlaw Sa Tinagong Dagat", "Mga Binuhat sa Lawod", ug uban pa padayong nakakuha og paborableng review gikan sa mga kritiko. Hangtod karon, nagpabiling hagit nga panukdanan ang anino sa iyang dagang sa mga nanagtuon. Ang katilingbang magbabasa, nagpangita usab sa iyang mga sinulat. Ug busa, ang paghigawas sa patikanan niining maong libro maisip sab nga "The Essential Gremer Chan Reyes" tungod kay definitive man kini sa iyang arte sa panugilanon.
Hinuon, ang napulo ka sugilanon nga nahiluwan niining maong antolohiya kinapon lang sa nahaunang libro nga "Mga Gagmayng Tingog Sa Protesta". Lamang, kining naulahi walay hubad sa Iningles ug gipatik lang ingong limited kun collector’s edition.
Daghan ang buot moawat sa estilo ni GCR. Apan nag-inusara lang ang nagbansay sa iyang tulunghaan sa panulat. Siya ra sab mismo. Ug ang pagsundog sa iyang tulunghaang katitikanon ambisyon nga way katumanan. Sa laing pagkasulti, bituon siyang nag-inusara sa kawanangan niyang gisigyaban.
Ang taghubad ning maong libro, si Dr. Hope Sabanpan-Yu, Associate Professor sa Unibersidad sa San Carlos ug kasamtangang sakop sa literary committee sa NCCA. Si Dr. Yu maoy nagpaluyo sa duha ka libro nga "KULOKABILDO: Dialogues With Cebuano Writers" ug "KAPULONGAN: Conversations With Cebuano Writers". Siya sab ang awtor sa upat ka koleksiyon sa mga balak. Gihubad sab niya ngadto sa Iningles ang nobela ni Austregelina Espina-Moore nga giseryal dinhi sa Bisaya (Ang Inahan Ni Mila) dugay na. Sa pagkakaron, giandam na usab ni Dr. Yu ang uban pang proyekto sa pagpanghubad sa mga Binisayang abot sa dagang ngadto sa Iningles alang sa pag-aprisar niini sa mas halapad nga magbababasa.—
(For inquiries, please visit the Cebuano Studies Center, San Carlos University, Cebu, Philippines.)
