1/15/2009

Nostalhiya Sa Amerika

Teksto ni EGAY TALIPSAI
Mga hulagway kortesiya sa banayng Allego



ANG tawong may tim-os nga pagbati, bisan sa mga kalamposan sa kinabuhi sa laing yuta, mag-iliw gayod sa dapit nga gilubngan sa iyang pusod. Maghandom. Ug dili kay taman ra sa paghandom sa nangagi apan sa tanang nahimong tipik sa iyang kagahapon. Buot niyang sination pag-usab ang pait man kun tam-is nga nangagi uban sa iyang kabanayan ug kahigalaan.


Kini ang nostalhiya nila ni Dr. Melquiadito M. Allego, Jr. ug mga kauban nga atua na manimuyo sa Amerika. Gimingaw sila ilabi na sa ilang mga kahugoy-hugoy kanhi. Ug busa, ang hinapos sa Enero (karong sunod bulan) markado na sa ilang kalendaryo. Mamakasyon sila sa Sugbo aron makigkita-kita.


Ang Enero 31, 2009 adlawng Sabado, gigahin niya sa kaigsoonang mga magsusulat. Gisangpit niya ang iyang kaubanan sa BATHALAD (Mindanao ug Sugbo) ug ALBICALARIVI Poetry Group alang sa usa ka Reunion-Convention.


Manambong gikan sa Amerika sila si Dr. Urias Almagro, Dr. Ben Jabel ug Dr. Mel Allego ug banay aron pagpakighimamat sa mga magsusulat. Ug kon way kakulian puhon, manambong usab ang taga Bisaya. Ayaw kalimot. Magkita-kita ta puhon!—

No comments: